Ihre Browserversion ist veraltet. Wir empfehlen, Ihren Browser auf die neueste Version zu aktualisieren.

Haideblitz ond Sonneschai


Grüß Gott liebe Nachbarn!

S´isch jedes Joahr desselbe. Die Preise von de Stroßaboh werde deirer.

Nadürlich au diesmal wieder. Wenn i mi omher, überäll s´Gleiche Gschwätz. „Die spennet, schon wieder deirer. Stuagard isch eh am deierste.“

Kehret Sie au zu denne? I verstands ehrlich gsagt net.

D´Stroßaboh, also onser SSB isch doch seid Joahr ond Dag im Wandel. S ´isch no net lang her, als die alt Stroßaboh no gfahre. Heid fahred bloos no moderne Züg.

Die koschded Geld.

Mit denne neue Züg hot SSB au die Barrierefreiheit eigführt. Seitdem könne mir äberdig in de Zug eisteige. Dofür hend se die Bahnsteig erhöht. Des koschd Geld.

Früher bisch nach Zwölfe nemme aus der Stadt raus komme. Des ging bloos no mit em Taxi oder mit dem eigene Audo. Heud kansch mit der SSB am Wochenende ond sagar an Silvester hoim fahre, jede Stond fährt aus de Stadt raus en Bus, oder dann früh om halb fenfe wieder a Stroßaboh. Somit kommd ma oimal pro Stund raus aus d´Stadt.

A subber Sach, aber, des koschd Geld.

Erinneret se sich no. Die SSB-Bus wared früher böse Diesel-Stänker. Bisch hender her gfahre, hosch d´Nas zukalte. Ond heut? Se merket fascht nix me von de Abgas ond leise send se au gworde. Au hier gibt’s immer mehr absenkbare Busse, die sich dem Niveau vom Bordstein anpassed, do kennet se dann au oifach neilaufe, stufenlos.

Des koschd Geld.

Bis vor a paar Joahr hen die Mönchfelder bloos ihr´n 54er kennt. Heid hend se de Bus und zusätzlich d´Stroßaboh. D´Fasanehof isch ab sofort au mit dr Stroßaboh erreichbar. Uff älle Linie, selbstverständlich tagsüber im 10 Minutentakt. Ab nächstem Joahr fahrd mr mit de Stroßaboh au wieder durch Zuffehause bis nach Stamme naus.Älles mit d´r neue Stroßaboh. Des koschd Geld.

Jetzt froag i mi, warum Sie sich uffreget, das die Tickets jedes Joahr deurer werdet.

Mir hend a moderne Stroßaboh, die emmer im Schuss kalte wird ond ständig ausbaut wird. D´Fahrzeug, ob Bus oder Stroßaboh, send emmer aktuell. Des koschd Geld ond i muss sage, dafür zahl i gern des Geld!


Lasst Sonne in Euer Herz

Euer

Michel FreiMönch